LEGAZPI CITY-Nakahanda na an grupong Piston para sa isasagibong transport strike ipangapudan an padagos na paglangkaw kan produktong petrolyo huli sa tensyon sa Middle East.
Mapoon an welga ngonian na aldaw nin Huwebes, Marso 19, sa National Capital Region (NCR) asin iba pang mga rehiyon sa nacion.
Segun ki PISTON President Mody Floranda, sa intrevista kan Bombo Radyo Legazpi na ma-welga sinda laban sa paglangkaw kan presyo sa produktong petrolyo na nagpapahirap bako sana sa hanay kan mga driver asin operator kundi magin sa mga namamanwaan.
Makikisumaro man an ibang mga probinsya sa nacion bako sana an grupo, kundi magin ang mga miembro kan kooperatiba.
Piglalaoman man na makikisabay sa hiro protesta an mga nasa sektot, mga commuters, simbahan, jovenes, mga obrero, mga paraooma asin parasisira na biktima kan paglangkaw sa presyo.
Padagos man sindang magsasagibo nin mga hiro protesta hasta sa dai nakakamit an saindang mga pangapudan.
