Pighihiling na kan Minor Basilica asin National Shrine of Jesus Nazareno o Quiapo Church an pag-implementar nin nagkapirang pagbabago sa proseso asin iba pa para sa Traslacion sa 2027 makalihis an haros 31 oras na prusisyon kan Poong Hesus Nazareno kan nakaaging Biyernes.
Segun ki Nazareno 2026 Spokesperson Fr. Robert Arellano, posibleng magkakaigwa nin mga pagbabago sa mga andas na nagdadara kan Poon asin maging sa mismong crowd management huli sa narekord na apat na casualties sa bilog na prusisyon.
Nareparo man kan liderato kan Quiapo an pagiging agresibo kan nagkapirang deboto, partikularmente kan mga jovenes, na nagpoporbar na magsakat sa float, kaya nagluya an pag-usad kaini.
Manungod sa mismong ruta kan prusisyon, pighihiling man kan simbahan an posibilidad na pahalipoton an ruta na kalimitang pig-aagihan kan Poon nganing maparikas asin mapahalipot an oras na gagamiton kaini sa prusisyon.
Nagpahayag man nin kaparehong sentimento si National Capital Region Police Office (NCRPO) Spokesperson Maj. Hazel Asilo kun saen sinabi kaini na importante man na pahalipoton an oras kan traslacion para sa kaligtasan kan mga deboto.
Pinakamarahay suboot na mag-agi an float sa mga darakulang kakalsadahan asin bako sa mga eskinita ngani na maseguro na wara nin maiipit asin magin mahiwas an prusisyon mismo.
Mientrastanto, an liderato kan simbahan kan Quiapo asin an mga katuwang na ahensya kaini nakatalaan man na magsagibo asin magkondusir nin critique session para sa mas malinaw asin marikas na Traslacion sa masunod na taon.
