LEGAZPI CITY – Takot an namamatean ngunyan kan mga residente kan Brgy. Trece Martirez sa banwaan kan Casiguran, Sorsogon kun sain nag-ibakwar an nagkapira sa mga ini makalihis an sarong engkwentro sa pagultanan kan pwersa kan gobyerno asin mga rebeldeng grupo.
Sigon ki Col. Fernando Trinidad, commander kan 903rd Brigade, nangyari an nasambitan na engkwentro bandang alas 9:00 nin aga na naghaloy nin sampulong minuto.
Nakabakbakan kan Alpha Company kan 31st Batallion sa pamamayo ni Lt. Pendejito an labi sa 30 myembro kan New People’s Army o NPA.
Saro sa mga kumpirmadong lugadan an sa lado kan mga soldados kun sain ipighayag ni Trinidad na daplis man sana an sinapar kaini makalihis na magsabog an sarong landmine sa lugar.
Mientrastanto, pig-aaram pa sa ngunyan kun igwa nin nalugadan sa lado kan rebeldeng grupo mantang nagpapadagos pa an pursuit operation.
Narekober man sa pinangyarihan kan insidente an nagkapirang mga wires na pig-eeksamen pa urog na sa posibilidad kan mga nakatanom pang improvised explosive device (IED) sa nagin encampment area kan mga NPA.
Magigirumduman na ipighayag ni Southern Luzon Command (SOLCOM) sa pangengenotan ni Lt. Gen. Ferdinand Quidilla na saro an probinsya kan Sorsogon sa mga priority areas sa Bicol region katakod kan nagpapadagos na kariribokan.
Ini an pinakaenot na enkwentrong nairehistro sa rehiyong Bicol makalihis na ilift ni Presidente Rodrigo Duterte an ceasefire sa pagultanan kan Communist Party of the Philippines-New People’s Army-National Democratic Front (CPP-NPA-NDF).
