LEGAZPI CITY — Binawian nin buhay an pigkokonsiderar na most notorious asin most wanted gun-for-hire sa probinsya kan Masbate sa tahaw kan isinagibong operasyon kan mga kapulisan sa Villa Alvarez, Barangay San Pablo, Mandaon.
Binisto an suspek na si Leonardo del Rosario alyas Padoy, na suboot pamayo kan pig-aapod na Del Rosario Gang o Sako Gang na nag-ooperate sa mga banwaan kan Milagros, Mandaon, Baleno, Balud, asin Aroroy.
Napag-araman na ini man an ika-duwa sa most wanted person sa rehiyon.
Siserbihan kuta nin anom na mandamiento de aresto an suspek kaiba an limang iba pa na lunad kan duwang motorsiklo kan manlaban an mga ini.
Binalo kan grupo na magdulag sa paagi kan pagpapaputok sa mga pulis alagad tulos na binawian nin buhay si Padoy asin an ama kaini na si Norberto del Rosario.
Mientras tanto, nagibo pang maidalagan sa ospital si Alemado del Rosario na lugadan man alagad binawian man nin buhay.
Sa ngunyan, nasa kamot kan mga otoridad sinda R.V. Marino del Rosario, Roger del Rosario asin Romeo del Rosario na anas miyembro kan Del Rosario Gang asin residente kan banwaan kan Balud.
Kun babalikan, si papoy an lider kan gang na nasa likod kan serye nin panggagadan sa probinsya.
Saro na digdi an pag-ambush kan 2015 kina Samson Suplito, Jeremiah Suplito, asin Flor Rapsing kun saen pinugutan muna nin payo si Rapsing antes badilon.
An grupo man an pigtuturong may kagibuhan kan panghahabas, paggadan asin pag-carnapp sa sarong pagsadiri nin gold refinery na si Jesus “Ka Isong” Amaro, aki kaini na si Boyet, asin an driver ninda kan parehong taon.
Apwera pa kaini, si Papoy man an suboot suspek sa panggagadan ki “Dos por dos” anchorman Joaquin Briones ngunyan na taon.
Sa ngunyan, nagpapadagos pa an imbestigasyon kan mga otoridad dapit sa insidente.
