LEGAZPI CITY—Sarong pinagtutubudang marijuana an nakumpiskar kan mga otoridad sa sarong pasahero sa Matnog Port, Sorsogon.
Segun ki Matnog CPS COP Police Captain Jonathan Hapa, sa intrevista kan Bombo Radyo Legazpi, sarong pasahero na gikan sa Metro Manila an mapasiring sa probinsya kan Samar, alagad kan pagbugtak kaini nin bagahe sa screening section, digdi na nadiskubre kan empleyado kan pantalan na may laog nin kadududa-dudang pinagtutubudang ilegal na droga an saiyang bagahe.
Tulos ining binuksan kan nag-iinspeksyon para iberipika kun ano an tunay na laog kan nasambit na bagahe, asin digdi na tuminambad an 0.5 na pinagtutubudang marijuana.
Kan naaraman an laog kaini tulos na nag-apod an nag-inspeksyon nin mga otoridad para makumpirmar asin maproseso an suboot pinagtutubudang marijuana sa naunambitang bagahe.
Susog sa imbestigasyon, nasa 0.5 an gabat kan pinagtutubudang marijuana asin may street value na P500.
Tinawan-doon kan opisyal na dawa sadit sana an kantidad kan ilegal na droga, bawal man liwat ini asin bawal man an magdara o warang magkakanigong permiso sa mga ahensya.
An suspetsado posibleng mahampang sa kasong pagbalgar sa Republic Act 9165 o Comprehensive Dangerous Drugs Act of 2002.
Mientrastanto, nangapudan an opisyal sa publiko na ibitaran an paggamit nin ilegal na droga huli ta may magkakanigong padusa ini asin wara man na maidudulot na maray sa buhay kan indibidwal.
