Pigkokonsidera ngunyan kan gobyerno kan Pilipinas an pagpapaaram muna na tuyong magsasagibo nin resupply mission sa Ayungin Shoal kasunod kan pinakahuring engkwentro kontra sa China.
Segun kay Executive Secretary Lucas Bersamin, kaiba ini sa mga napagdesisyonan sa meeting kan National Maritime Council asin ipigrirekomenda na ngunyan kay Presidente Ferdinand Marcos Jr.
Sa nasabing rekomendasyon, isasapubliko asin iaanunsyo muna kan gobyerno an resupply mission ngani na maibitaran na an tensyon kontra sa China.
Nilinaw man ni Bersamin na dae pa pigkokonsidera kan Pilipinas an pag-envoke nin Mutual Defense Treaty sa Estados Unidos na posible sanang magpalala sa sitwasyon.
Nanindugan man an National Maritime Council na sa ibong kan insidente nagtitinir na halangkaw an moral kan mga suldado kan Pilipinas.
