Ipinagbabawal kan Pilipinas an pag-angkat nin mga bayong asin poultry products hali sa Michigan, United States huli sa paglakop kan birf flu sa nasabing estado kan Amerika.
Nagpaluwas si Agriculture Secretary Francisco Tiu Laurel Jr., nin Memorandum Order No. 24 na tulos suspendiron an pag-angkat nin mga domestic asin wild birds asin may mga kinaaraman na produkto, kaibanan na an poultry meat, bonay asin semilya hali sa Michigan.
Iniluwas an importation ban makalihis na magsumiter an US Chief Veterinary Officer nin opisyal na report sa World Organization for Animal Health dapit sa pagbungkaras kan H5N1 subtype kan avian influenza sa Michigan na kinumpirmar kan National Veterinary Services Laboratories sa Ames, Iowa kan Marso 29.
Sinabi kan Department of Agriculture na naobserbaran kan mga otoridad kan Estados Unidos an marikas na paglakop kan virus, na nagresulta sa pagpapahiwas kan mga pagpapahigot sa kalakalan ngani na mapangatamanan an lokal na populasyon kan manok.
