LEGAZPI CITY – Hinale kan Philippine Institute of Volcanology and Seismology (Phivolcs) an paghadit kan publiko makalihis na magluwas sa sarong pag-aadal na an “Apolaki Caldera” sa Benham Rise an posibleng pinakadakulang caldera sa bilog na kinaban.
Segun sa Filipina marine geophysicist na si Jenny Anne Barretto asin duwa pang foreign scientists na nagsagibo kan pag-aadal, nasa 150 kilometro an diameter kan Apolaki o nasa 90 kilometers na mas dakula sa Yellowstone caldera na saro sa mga largest caldera sa mundo.
Pag-eksplikar ni Phivolcs Director Usec. Renato Solidum sa ekslusibong intrevista kan Bombo Radyo Legazpi, an caldera an dakulang crater na nacrear kan pagsabog kan sarong bulkan.
Parte suboot ini kan ocean island plateau an Benham Rise sa Philippine Sea na darakulang bulkan na may kakayanang magbuga nin halangkaw na volume kan lava.
Alagad segun ki Solidum, haloy na suboot na bakong aktibo asin nagkapirang milyong taon nang dae nagsasabog an Apolaki.
Pag-aadal sana suboot an obheto kan pagkadiskubre kaini asin parte kan pagmapa tangarig na mareconocer na parte pa kan Pilipinas.
An Benham Rise an nasa distansyang 400 kilometro sa rehiyong Bicol alagad bisto ini bilang “Kalipung-awan” na pigsisiraan kan mga taga-Catanduanes.
