LEGAZPI CITY – Takdag sa kamot kan mga otoridad an pigkokonsiderang regional target-listed drug personality sa ikinasang buy-bust operation kan Philippine Drug Enforcement Agency sa ciudad nin Tabaco, Albay.
Segun ki PDEA Bicol Spokesperson Carlo Fernandez sa intrevista kan Bombo Radyo Legazpi na binisto an nadakop na si alyas “Chie”, 42 anyos, sarong driver, asin residente kan Barangay Fatima kan kaparehong ciudad asin provincia.
Kinonsidera an suspetsado bilang regional target-listed individual huli ta bako sana suboot sarong provincia an saiyang pigtatawan nin supplya kan mga kontrabando huli man sa saiyang trabaho.
Nakuwa sa kagsadiri ni alyas “Chie” an pitong sealed plastic sachets kan pigtutubudang shabu na may pigkakarkulong gabat na 10 gramos na may standard drug price nin maabot sa ₱68,000.
Pigtaram pa kan opisyal na dakulang bagay an pagkakadakop sa suspetsado sa saindang anti illegal drugs campaign huli ta pagladawan niya an naputulan nin sarong galamay na maputol man sa pigkukuwaan na source kan mga naggagaramit kan kontrabando.
Haloy man suboot na pigmanmanan kan saindang regional enforcement team asin pig-asigurar na madadakop ini sa sarong buy-bust operation sana sa pagtatarabangan man kan manlain-laing grupo asin law enforcement agencies.
Sa presente nasa kustodiya na kan PDEA Bicol an suspetsado asin mahahampang sa pagbayolar sa Republic Act 9165 o Comprehensive Dangerous Drugs Act of 2002.
Nagpasalamat man si Fernandez sa publiko huli sa magayon na partisipasyon sa paagi kan pagtataong aram sa saindang ofisina manungod sa mga ilegal na kalakaran na nangyayari sa saindang lugar nganing masawata tulos ini asin mapugulan an paglakop kan ilegal na droga.
