LEGAZPI CITY – Dakulang kaugmahan asin katabangan suboot para sa lado kan Bureau of Fire Protection (BFP) Bicol kun enkasong maaprubaran an ipigbubusol na ordinansa ni Board Member JP Lee na pagkakaigwa nin volunteer fire brigade kan kada barangay.
Ipig-endorso kaya kan nasabing opisyal na i-obliga an 720 na barangay sa provincia nin Albay na magbilog nin volunteer fire brigade ngane na makatabang enkasong magkaigwa nin kasulo.
Segun ki Chief Supt. Igmedio Bondoc Jr, regional director kan BFP Bicol, dakulang kaugmahan sa parte ninda an pag-organisa nin kadakol na volunteers na saindang makakatabang.
Alagad segun sa director, an saindang manhamiento man liwat an mangingibabaw antes magkaigwa nin pag-atake an mga volunteers.
Kaipuhan kaya suboot nin koordinasyon ngane na mas marekas na maapula an kasulo.
Kun mawot suboot magtabang sa paghali kan kasulo, kaipuhan sanang maghapot sa fire ground commander kan dapat na gibuhon.
Sarong magayong paagi suboot ngane na madali an pag-apula kan sulo segun sa opisyal, iyo an bucket-relay huli sa organisado asin synchronized ini.
Kun magkakanya-kanya kaya suboot na apun ki tubig an mga residentes, dae sana mahaloy an paggadan kan sulo kundi dakula an posibilidad na magdakula pa ini.
