LEGAZPI CITY — Nagtutubod an nagkapirang lehislador na igwang mga personalidad na garing pigbubulang an Bureau of Customs (BOC) asin Philippine Drug Enforcement Agency (PDEA) tangarig na maraot an makusog asin seryosong laban kontra sa iligal na droga kan administrasyong Duterte.
Katakod ini kan pagbungkaras kan impresyon na warang matanos na koordinasyon asin relasyon an duwang ahensya sa paglusot kan pigsasabing maabot sa P7-billion na ‘smuggled shabu’ makalihis na makua an apat na magnetic lifters sa sarong warehouse sa Cavite.
Sa intrevista kan Bombo Radyo Legazpi, ipighayag ni House committee on dangerous drugs chair Cong. Robert Ace Barbers na bako harayong mangyari na kalaban kan gobierno an nasa likod kan propaganda alagad klinaripikar na diit na miscommunication asin misunderstanding sana an nangyari.
Segun pa ki Barbers, dae pa makakapag-conclude na “shabu” an laog kan mga magnetic lifters hasta warang “body of crime” o physical evidence na naipipresentar.
Mientras tanto, kumpiyansa man an opisyal na naipaaram na sa publiko kan duwang ahensya na warang iwal o kompetisyon sa pagultanan kan mga ini urog na saro man sana an obhetom iyo an masolusyunan an problema sa illegal drugs.
Sa ibong na lado, ipigduon kaini an padagos na pag-iimbestigar sa nasabing orolay.
