LEGAZPI CITY—Ipigdoon kan Philippine Institute of Volcanology and Seismology na nagtitinir na warang pagbabago sa monitoring parameters kan aktibidad kan bulkang Mayon sa nakalihis na mga aldaw, mantang presenteng nasa alert level 3 ini.
Segun ki PHIVOLCS Volcano Monitoring and Eruption Prediction Chief Mariton Bornas, sa intrevista kan Bombo Radyo Legazpi, kan nakalihis na magdamlag nairehistro an padagos an pagbuga kaini nin lava na may minsanan na minor strombolian activity, mas hababang rorckfall events, asin warang nanutaran na masyadong pyroclastic density currents o uson.
Nairehistro man an low frequency volcanic earthquakes mantang padagos man an halangkaw na pagbuga nin sulfur dioxide emission kan bulkan.
Dugang ni Bornas na padagos man an pagdaloy kan lava partikularmente sa parte kan Mi-isi asin Bonga gullies.
Paliwanag niya na sa presente haros warang pagbabago sa aktibidad na kakaiba para sa bulkan huli sa kan mga nakalihis na pagputok kaini an maski papano igwang kaso nin heavy explosive eruption o intense lava fountaining.
Mientrastanto, posible man na magrekomenda an ahensya sa mga local government units na sinda na mismo an magdesisyon sa evacaution plans en kaso warang pagbabago sa monitoring parameters kan bulkan makalihis an anom na bulan npuon kan itinaas ini sa alert level 3.
Mientrastanto, liwat na nagpatanid an opisyal na likayan an paglaog sa 6 km radius Permanent Danger Zone huli sa huma kan volcanic hazards.
