LEGAZPI CITY-Piglinaw kan Philippine Institute of Volcanology and Seismology (PHIVOLCS) na nasa Alert Level 3 man liwat an Bulkang Mayon sa ibong kan naoobserbahang pagbaba kan mga parametro.
Segun kay Phivolcs Mayon Volcano Observatory Supervising Science Research Specialist Dr. Paul Karson B. Alanis, sa intrevista kan Bombo Radyo Legazpi na sa presente nakataas man liwat an Alert Level 3 sa palibot kan bulkan.
Nakapagrekord man nin 9 volcanic earthquakes asin 5 rockfall events an Mayon Volcanic monitoring team, kun sain naobserbahan an pagbaba kumparar kan nakalihis na semana.
Alagad, tinawan doon kan opisyal na nasa Alert Level 3 man giraray ini huli ta nagtetenir na halangkaw an ibang parametro kun sain nasa haros 2,000 tonelada kan asupre an nairehistro.
Sinabi pa ni Alanis na an pagigin abnormal kan Mayon lagpas na nin haros 200 na aldaw alagad an pagigin tahimik naghaloy sana nin pirang aldaw.
Kaya, mahigot man liwat an patanid kan ahensya na ibitaran an paglaog sa 6km permanent danger zone.
Sa ngonian, pighahalat pa ninda an tuluyang pagbaba kan mga parametro ngani maibaba na an lebel kaini.
Enkaso tuluyang magbaba an mga parametro kan Bulkang Mayon, posible nang ipaotob an decampment asin posible nang makabalik an mga residentes sa laog kan 6km permanent danger zone.
