LEGAZPI CITY-Padagos an pigsasagibong monitoring kan Philippine Institute of Volcanology and Seismology (PHIVOLCS) sa Bulkang Mayon huli ta nagtetenir man liwat an halangkaw na aktibidad kaini.
Susog sa huring datos kan ahensya, nakapag-rehistro an Bulkang Mayon nin 29 volcanic earthquakes asin 11 rockfall signals sa bilog na magdamlag.
Nagtetenir man sa alert level 3 an bulkan asin padagos an pagdaloy kan lava sa tulong gullies kaini, kun sain nasa 3.8 km na sa parte kan Basud gully, 3.2 km sa Bonga gully, asin 2.7 km sa Mi-isi gully.
Nairestro man an haros 1, 220 na tonelada kan asupre na ipigbubuga kaini poon kan Agosto 1, 2026.
Padagos man an katamtamang pagsingaw kan bulkan na nag-aabot sa 100 meters hale sa crater asin napapadpad sa south-southeast asin south-southwest.
Huli digdi mahigot man liwat an patanid kan Phivolcs na likayan an paglaog sa 6km permanent danger zone.
