LEGAZPI CITY—Liwat na nagpatanid an Philippine Institute of Volcanology and Seismology sa huma kan lahar flow gikan sa Bulkang Mayon huli sa posibleng mamatean na pag-uuran dara kan pigbabantayang raot nin panahon sa nacion.
Segun ki Phivolcs Monitoring and Eruption Prediction Division Chief Mariton Bornas, sa intrevista kan Bombo Radyo Legazpi, huli sa dakol na mga natambak na pyroclastic density currents’ deposits o uson urog na sa may parte kan Mi-isi gully kan nakalihis na bulan kun kaya piglalaoman an lahar depende kun gurano kakusog an pag-uuran.
Huli man sa halangkaw na an tambak na deposito kan uson kaysa sa dadaluyan kan salog, an halangkaw an tsansa na ma-divert an salog asin mahanap ini nin panibagong pathway na posible man na magdara nin lahar sa mga lugar harani sa Mi-isi gully partikularmente sa parte kan banwaan nin Daraga.
Nagpatanid man an opisyal na mag-doble ingat an mga lugar na nakapalibot urog sa southern asin eastern part kan bulkan magin sa mga barangay na harani sa mga salog na naghahale sa Mi-isi gully siring kan Mi-isi, Binaan, Mabinit, Bonga, Matanag, Buyoan, Padang asin Basud channel.
Katakod kaini nagpagiromdom man si Bornas na magsunod sa mga direktiba kan mga otoridad urog na kun makukusog an pag-uuran, may advisory hale sa Phivolcs, o temporary evacuation order hale sa lokal na gobierno.
