LEGAZPI CITY- Pinag-aadalan na kan Philippine Institute of Volcanology and Seismology (PHIVOLCS) an mga nakukuang datos sa ipigsasagibong pag-eksamin ngonian na aldaw na magdidikta suboot sa posibleng pagbaba kan nakabanderang Alert Level 4 status sa Bulkang Mayon.
Sa intrevista kan Bombo Radyo Legazpi ki PHIVOLCS resident volcanologist Ed Laguerta, liwat na nagkupos an ibabang parte kan bulkan sa ibong kan sunod-sunod na nairehistrong saradit na pagputok kaini puon kasuodma hasta kasubanggi alagad hubag man giraray an itaas kan Mayon volcano.
Katakod kaini, nagsasagibo an team nin eksaminasyon sa tamang measurement kan gas output, ground deformation asin iba pang parameters urog na magayon an presenteng kamugtakan kan panahon.
Mientras tanto, en kaso na maasegurar na nagbaba na an pressure sa laog asin wara nang bagong papasakat na magmatic activity, nakatalaan naman na magpaapod kan press briefing an PHIVOLCS sa pormal na anunsyo kan pagbaba sa Alert Level 3 status.
