LEGAZPI CITY — Hinali kan Philippine Institute of Volcanology and Seismology (Phivolcs) an pagkahandal kan publiko katakod kan nairehistrong haros magkakasunod na pagyugo sa manlaen laen na parte kan Bicol region sa mga nakalihis na aldaw.
Sa ekslusibong intrevista kan Bombo Radyo Legazpi kay Phivolcs Dir, Renato Solidum, normal sana suboot na pangyayari sa Philippine sea an pagsuksok pairarom kan bloke nin bato sa pig-aapod na Philippine trench kaya nagkakaigwa nin paminsan-minsang paghiro.
Pag-eksplikar pa ni Solidum na sa nasambitan na paagi man suboot nagkakaigwa nin release kan tubig urog na kun nagsusuksok an bato hasta sa 100 kilometro.
Ini an resulta kan pagkatunaw kan mga bato o magma na nagseserbing supply kan bulkan.
Marurumduman na nagkapirang aldaw na man na nakaka eksperyensya an Bicol region nin mga pagyugo segun sa datos kan Seismological Observation and Earthquake Prediction Division kan PHIVOLCS partikular na an mga banwaan kan Prieto Diaz asin Gubat sa Sorsogon, Daet asin Capalonga sa Camarines Norte asin kasubagong aga sa Claveria sa Masbate na puon sa magnitude 2 hanggang magnitude 3.1 an pinakamakusog.
