LEGAZPI CITY- (Update) Hinale kan Philippine Institute of Volcanology and Seismology (PHIVOLCS) an paghadit kan publiko makalihis an mga naobserbahang pagbuga nin abo o duwang phreatic eruptions sa Bulkang Mayon, pasado alas-8:00 kasubagong aga.
Ipig-eksplikar ni PHIVOLCS resident volcanologist Dr. Ed Laguerta sa ekslusibong intrevista kan Bombo Radyo Legazpi na parte kan nasabing volcanic activity kan pagluluwas kan mga lumang materials kan bulkan na pig-aapod na “degassing activity”.
Nag-abot sa 200 hasta 600 metro an langkaw kan ibinugang abo kan bulkan hale sa tuktok na pasiring sa sur-sulnupan na direksyon an tinahak o sa parte ka tercer distrito kan Albay.
Segun pa ki Laguerta, hali an emission o pagbuga sa “pressurized pocket” sa ibabaw kan bulkan kun sain may suplay pa kan mainit na magma asin nagkakalaga-kagang tubig na nagcausa kan makusog na pwersa sa pag-itsan kan abo asin kan nagkapirang saradit na gapo.
Pigbabantayan naman sa presente kan PHIVOLCS an nagkapirang parametro na posibleng magtakod sa panibagong papasakat na magma na magka-causa nin pag-utro kan kaparehong insidente na nangyari kaitong enot na quarter kan taon.
Alagad klinaripikar ni Laguerta na wara pa sindang nahihiling na indikasyon afuera na sana sa paghubag o inflation sa southeast side kan bulkan.
