LEGAZPI CITY — Nilinaw kan Philippine Institute of Volcanology and Seismology (Phivolcs) sa Bicol na bako sinda an otorisadong magtao nin sertipikasyon sa mga mawot magtugdok nin anumang edeficio harane sa Bulkang Mayon o anuman na imbwelto sa hazards.
Segun ki Phivolcs Science and Research Analyst Alex Baloloy, an opisina sa Manila an nagtatao kan sertipikasyon maski pa naka-address si Ed Laguerta an request na ngonian pigpapabago huli ta an director kan ahensya an signatory digdi.
Segun ki Baloloy, dae sinda nagdi-disqualify kundi pigtuturuan kan impormasyong ikakaag sa sertipikasyon asin tatawan nin mga kondisyon na paghuhurop-hurupan kan mga naghagad kan sertipikasyon.
An 6 kilometer permanent danger zone suboot an talagang warang permanent habitation kun kaya saro ining basehan ninda ngane na dae palaugon an anuman na proyekto huli sa kun enkaos magkaigwa nin pagputok, mako-contain tulos an area.
Sa ngonian, nagtetenir man liwat sa alert level 1 an Mayon asin padagos na pigmo-monitor an seismic activity asin an sulfur dioxide gas na ipigbubuga kan bulkan asin an ground deformation.
Dae pa man suboot pwedesir magbaba an alert level status huli sa nagtetenir na may abnormalities pa an aktibidad kan Bulkang Mayon.
