Ma-deploy nin kabilugang 1,261 personnels asin volunteers an Philippine Red Cross (PRC) para sa taonan na Kafiestahan kan Poong Jesus Nazareno sa Biyernes, Enero 9, nganing magresponde sa mga posibleng medical emergencies sa panahon kan Traslacion.
Sa sarong press briefing kan Miyerkules, sinabi ni PRC Chairman Richard Gordon na an saindang mga personahes i-aassign sa 17 first aid stations asin 17 welfare desks na nakaposisyon sa ruta kan Traslacion, kun saen piglalaoman na maruso an milyun-milyong deboto.
Bilang parte kan preparasyon, an PRC magdedeploy man nin 17 first aiders on wheels, 12 roving scooter, 19 ambulansya na nakadeploy sa mga ruta, asin 20 standby ambulance.
Igwa man nin duwang rescue boards asin tolong rubber boat na nakapreparar para sa posibleng water rescue operations.
Pighanda man kan PRC an 50-bed emergency field hospital na mahihiling sa Kartilya kan Katipunan Monument kataid kan Manila City Hall.
Papangenotan ini kan 60 medical personnel asin nakahanda na magresponde sa mass casualty incidents siring man sa minor asin moderate incidents.
Walong PRC chapters asin walong PRC branches an nakatutok man sa National Capital Region nganing magtao nin dagdag na tabang enkaso magkaigwa nin emerhensya sa prusisyon.
Inabisuhan kan PRC an mga deboto na isurat sa sarong papel an saindang personal information asin medical condition asin darahon ini sa panahon kan Traslacion.
An mga partisipante pwedesir man mag-download kan PRC emergency information card.
Mientrastanto, nangapudan an PRC, Quiapo Church, asin mga awtoridad sa publiko na magsunod sa mga pagirumdom asin direktiba nganing maseguro an ligtas asin maray na pagsasagibo kan Traslacion.
 will deploy a total of 1,261 personnel and volunteers for the annual Feast of the Holy Nazarene on Friday, January 9, to respond to possible medical emergencies during the Traslacion.){kind=link}