LEGAZPI CITY-Nag-abiso an Philippine Embasy in Italy sa mga Pilipino na magin mas maingat asin dae magpasiring sa mga lugar na igwang pigsasagibong demonstrasyon.
Sa ipinaluwas na abso kan Embahada, piglalaoman na magkakaigwa nin mga demonstrasyon sa Rome, Milan, Florence, Turin, Bologma, Padua, Bari, Gerona sa aldaw nin Sabado, Oktubre 24.
Piglalaoman man an manlaen-laen na protesta asin mga pagmartsa sa Rome.
Pinayuhan man kan Embahada an mga Pilipina na dae makisumaro sa maski ano mang protest activities sa nasabing mga lugar.
Siring man sa darakulang mga pagtiripon, asin hasta sa posible, dae muna mag-biyahe pasiring sa mga lugar kun saen presenteng igwang hiro-protesta orog na sa mismong aldaw kan demonstrasyon asin public disturbance.
Pinayuhan man kan embahada na magsunod sa nagkapirang mga panuntunnan kan Italian authorities, asin pirmihang magdara nin mga importanteng identification documents asin emergency contact details.
Sinabi man kan Embahada na magin kalmado, asin iprayoridad an sadiring kaligtasan asin magin kan saindang pamilya sa mga lugar na nabanggit.
Inabisuhan man sinda na siertuhon na igwang bastanteng suplay nin pagkakan, inumong tubig, bulong asin iba pang pangangaipohan sa harong enkaso man na maapektaran kaini an saindang access sa mga pangenot na serbisyo.
An kabilaang demonstrasyon, magigirumdumang nag-resulta kan pagkaraot kan mga propriedad asin panghihimasok sa mga merkado.
Nag-ugat an kabilaang mga hiro-protesta, na inorganisa kan Piazza movement asin Piazza Duomo sa Milan kan Oktubre 17 na sinundan kan mga protesta sa France asin Spain huli sa naglalangkaw na cost of living, hababang pasahod, halangkaw na renta, asin public service shortcomings.
