LEGAZPI CITY- Aminado an mga otoridad na garing nasa survival initiative na an mga natatadang miyembro kan rebeldeng grupo.
Segun ki 9th Infantry Division division public affairs office chief Major Frank Roldan sa intrevista kan Bombo Radyo Legazpi na pigbabalikan kan mga ini an mga lugar na dati nindang kontrolado ngani na liwat na maipamati an saindang presensya.
Paliwanag kan opisyal na saro sa mga nadakol na rebelde an nagtaram na mawot nindang makakuwa liwat nin kwarta hali sa mga politiko urog na ngunyan na nagdadangadang an pirilian.
Sa presente wara man na nareresibeng report an ahensya na igwang mga politiko an nagsusuporta sa nasabing grupo, bako siring kan nakalihis na mga taon.
Katakod kaini, sinabi ni Roldan na warang poder an rebeldeng grupo na magpagana kan sarong politiko na nagdadangdang sa eleksyon kaya dae dapat magpadara sa mga ini.
Dugang pa kan opisyal na napuho na man an permit to campaign asin permit to win na dating nauuso sa nagkapirang parte kan nacion.
