LEGAZPI CITY- Padagos an pigigibong mga lakdang kan Puersa Armadas kan Pilipinas ngani na mahali an impluwensya kan mga rebeldeng grupo sa mga komunidad sa rehiyong Bicol.
Segun ki 903rd Brigade, Philippine Army Commander Brigadier General Jose Ricky Laniog na igwang mga community support program na pigigibo sa mga influenced barangays na saindang naaydentipikaran.
Pighihiling man suboot an functions kan mga barangay based institutions ngani na mabuwag asin makontra an mga grupo na pig-oorganisar kan mga New Peoples Army.
Sa ibong kaini, nilinaw kan opisyal na maski pa de-influenced na an sarong barangay dae man liwat nasi-sierto na wara ng presensya nin mga rebeldeng grupo huli ta nagbabalik suboot an mga ini ngani na makapag recruit nin mga bagong miyembro.
Sinabi ni Laniog na komon na pigtututukan sa recruitment kan nasabing grupo an mga kababaihan, mga paraoma asin mga jovenes.
Paliwanag kan opisyal kan enot na mga panahon an nasabing mga sektor an komon na dae naaabot kan serbisyo kan gobierno.
Alagad sa presente huli sa padagos na modernisasyon kan mga imprastruktura asin mga road projects, maski an mga hararayong lugar suboot an naaabo na kan serbisyo kaya nadidifisilan na an mga rebeldeng grupo.
An mga road projects an saro sa mga nahihiling kan mga otoridad na nagigin rason ngani na padiit-diit na matapos an problema sa insurhensya.
Mientras tanto, sinierto man kan opisyal na padagos an esfuersos kan Philippine Army ngani na na-sustain an saindang mga programa asin dae na maimpluwensyahan kan mga rebelde an mga lokal na komunidad.
