Tulos na ipig-veto kan Board of Directors kan Philippine Health Insurance Corp. (PhilHealth) an ipigpropwestong pagbakal nin P37.5 million na kantidad nin items para sa ika-30 anibersaryo kan state health insurer sa bulan kan Pebrero 2025.
An nasambitan na kantidad parte kan marketing asin promotional expense para sa official event kan PhilHealth.
Sa sarong pahayag, sinabi kan Department of Health na nagdesisyon an board of directors kan PhilHealth na pinangengenotan ni Health Secretary Ted Herbosa na kanselaron an propwestong pagbakal para makatipid sa pondo kan gobyerno asin masierto na maayos an alokasyon para sa mga benepisyo kan mga miyembro kan PhilHealth kasabay an pag-engganyar para sa financial responsibility.
Kasabay sa mga item na ipigpropwestong bakalon para sa anibersaryo kan state health insurer an mga payong na nagkakantidad nin P7,910,550.00, perforated mesh stickers na may kantidad na P7,300,000.00, tote bags na may kantidad na P1,820,000.00, anniversary shirts na may kantidad na P3,640,000.00, marketing shirts – P1,940,000.00, jackets – P13,650,000.00, katsa bags – P750,000.00 asin button pins na may kantidad na P545,000.00.
Mientrastanto, sa lado man kan PhilHealth enot na kaining ipiglinaw na nasa “few hundreds thousand pesos” sana an saindang gagamiton para sa ika-30 na anibersaryo para sa masunod na taon asin bako an inisyal na planong P138 million.
Ginibo ni PhilHealth president asin CEO Emmanuel Ledesma Jr. an paglilinaw sa hearing kan Senate Committee on Health and Demography makalihis na batikuson kan nagkapirang senador an inisyal na propwestog pondo kan ahensya para sa saindang anibersaryo.
