LEGAZPI CITY — Inako man Philhealth Bicol na nahuhuri na sinda sa pagproseso kan mga dokumentos na kinakaipuhan kaya nagkakaigwa sinda nin backlog sa nagkapirang ospital asin lying inn sa rehiyon.
Segun ki Geraldyn Naron, first in – first out an pagproseso ninda kan claim kan mga benipisyaryo.
Saro sa mga ipighalimbawa kan opisyal an backlog ninda sa Bicol Regional Training and Teaching Hospital (BRTTH) sa syudad kan Legazpi huli sa kadaklan kan mgpasyente digdi na miyembro kan Philhealth.
Pag-eksplikar pa ni Naron na nagkakataon sana na bulto-bulto an pigpapadarang claim sa ahensya hali sa ospital kaya dae tulos natatawan nin atensyon huli sa kakulangan nin personahes.
Sa ibong kaini, sinierto kan opisyal na pigigibuhan ninda nin paagi ngani na masolusyunan an nasambitan na problema sa backlog.
Mientrastanto, nangapudan man ini sa mga employed sectors na siertuhon na nagre-remit sinda kan saindang mga kontribusyon.
Dugang pa kaini na tulos na ipaabot sa saindang opisina kun may maaaraman na mga ospital na nang-aabuso sa mga benipisyaryo kaini.
