LEGAZPI CITY-Inakusaran ni Philippine Fencing Association Chief President Rene Gacuma si Leyte Rep. Richard Gomez nin pangungulog.


Nangyari suboot an insidente mantang yaon sa Thailand an delegasyon para sa nagpapadagos na 33rd Southeast Asian Games.


Segun sa surat na ipinadara ni Gacuma sa Philippine delegation chef de mission Dr. Jose Raul Canlas, inatake asin pigmuda suboot siya ni Gomez makalihis niyang kamayan an kongresista, kasunod kan pagkagana kan silver medal sa saiyang event.


Imbes na akoon an pakikisumaro, tinumakan suboot ni Gomez an bitis ni Gacuma, makusog na pinirit an saiyang mga gurumoy asin pinagmumuda an presidente kan ahensya.


Sinuriyawan suboot siya ni Gomez mantang pigkukuwestyon kun sisay an nagtao saiya nin otoridad na salidahan an nagkapirang atleta.


Base sa istorya ni Gacuma, kan ini makadulag, sinundan siya ni Gomez asin sinuntok sa likod kan saiyang pamayuhan.


Nag-poon suboot an komprontasyon sa desisyon ni Gacuma na palitan an national athlete na si Alexa Larrazabal sa women’s individual epee event, huli sa bigong magsumiter nin tamang dokumento, pirmihang pagabsent sa training, asin iba pang rason.


Ipinalit man kay Larrazabal an atleta na si Hannie Abella.


Plano man ni Gacuma, na magsangat nin kaso laban sa kongresista, alagad sa ngonian an nagkokonsulta pa siya sa saiyang legal counsel.


Sa presente, padagos an pakikipagkoordinar para sa kampo ni Rep. Gomez manungod sa nasabing isyu.