LEGAZPI CITY-Sinuspendir an Permits to carry firearms outside of residence (PTCFORs) sa Metro Manila huli sa nakatakdang mahiwasang protesta kontra korapsyon saaga, Nobiyembre 30.
Epektibo ini poon ngonian na aldaw nin Sabado, Nobiyembre 29 hasta sa Lunes, Disyembre 1.
Segun sa Philippine National Police, papayagan sana an pagbitbit nin mga badil an saindang mga miyembro kaiba an Armed Forces of the Philippines asin iba pang law enforcement agencies na nasa official duties siring man sa agency-prescribed uniforms.
Mientrastanto, piglalaoman kan kapulisan an dakulang numero kan nmga tawong makikibale sa mahiwasang rally.
Kasunod kaini, nasa 15,000 kapulisan an ipapakalat kan PNP asin naghahanda na sinda sa posibleng infiltration attempts kan mga grupong magpoporbar na magkakawsa nin kariribukan kapareho kan nangyari kan September 21 rally sa Maynila.
Sa ngonian wara man nin anumang banta an na-detect kan PNP, liwat naka-pokus an saindang intelligence monitoring sa potential agitators.
Pigsisierto man an pakikipagkoordinar sa ibang mga ahensiya ngani na mapugulan an anumang mga pag-hijack sa katoninongan kan rally.
