LEGAZPI CITY- Ikinahahadit kan sarong Peace Studies Professor na lumala pa an kariribukan sa Middle East kun magmamatagas an Iran na buksan an Strait of Hormuz.
Ini an kasunod kan 48 oras na palugit ni US President Donald Trump na sasakyadahon an mga power plants kan Iran kun dae bubuksan an Strait of Hormuz.
Segun ki Bicol University Peace Studies Professor Dr. Herbert Rosana sa intrevista kan Bombo Radyo Legazpi na an nasabing waterway an kontrolado kan Iran Revolutionary Guard.
Marurumduman na enot na man na nagpatanid an Iran na magsasagibo nin mga aksyon enkasong igwang mga suldados na maglaog sa nasabing teritoryo asin posibleng magkaigwa sinda nin prisoners of war.
An Persian gulf an dakulang katubigan na nakahampang sa Iran, United Arab Emirates, Oman asin nagkapira pang nacion sa Middle East asin sa paagi kan nasabing teritoryo, naipapaluwas an kadaklan sa mga oil products.
Alagad an Strait of Hormuz an pigkokunsiderar na laog sa teritoryo kan Iran sa ibong kan naga iral na international law.
Segun ki Professor Rosana na huli ta nagpatanid na si Trump, pinaglalaoman na gigibuhon kaini an babala kun dae makikipagtabangan an gobierno kan Iran.
Pighihilig na mawot na makontrol kan Amerika an langis sa Iran huli ta an siisay man na may kontrol sa suplay kan langis an pigkokunsiderar na may kalamangan sa mga kalaban na nacion.
