LEGAZPI CITY – Magkahalo an reaksyon kan sarong peace studies professor sa kahihinatnan kan mangyayaring mahiwasang hiro protesta sa manlain-laing parte kan nacion kasabay kan anibersaryo kan deklarasyon kan Martial Law.
Segun ki Bicol University Peace Studies Professor Dr. Herbert Rosana sa intrevista kan Bombo Radyo Legazpi na madepende an trayumpo kan mga mangyayaring hiro protesta kun ma-enganyar ninda an dakulang numero kan publiko na ikondena an nangyayaring korapsyon sa mga proyekto kan gobierno.
Alagad kun hahaloan nin ibang political agenda an nakakasang protesta, maresulta suboot ini sa paglimita kan mangyayaring aktibidad sa ibong kan bisto an pilipino sa pakikisumaro sa mahiwasan asin matuninong na mga protesta.
Piglalaoman niya na ipapa-otob kan Philippine National Police an maximum tolerance huli ta pwedesir mauli sa riot an protesta kun dae ninda mamanehar nin maray an mga ralihista urog na kun magamit sinda nin tear-gas nganing i-disperse an mga tawo.
Pigtaram pa kan naunambitang peace studies professor na dapat mauli an protesta sa pagkakaigwa nin pressure sa mga corrupt na public official asin dae na ninda papabayaan na mangyari sainda an nangyari sa mga tiwaling opisyal sa Nepal.
Posible man na makatabang an social media sa pagpapalakop nin ideya alagad pwedesir ining mauli sa peligro huli sa mga false narrative na nakakapabago sa pananaw kan sarong tawo.
Pagdoon man ni Rosana na sa demokratikong nacion arug kan Pilipinas an may direchos an namamanwaan na magprotesta huli ta parte ini kan saindang social contract sa pagultangan ninda asin kan lider mantang pwede sindang tanggalon sa pwesto kan publiko sa legal na paagi o maski extra-legal.
