LEGAZPI CITY – Mapadagos an mga programa kan mga militar sa mga probinsya kan Sorsogon asin Masbate sa ibong kan deklarasyon kan all-out-war kontra sa New People’s Army (NPA) ni Presidente Rodrigo Duterte.
Segun ki Captain Joash Pramis, an public affairs officer kan Philippine Army’s 9th Infantry Division, ipapadagos ninda an community support programs kan administrasyon sa irarom kan Development Support and Security Plan Kapayapaan sa duwang probinsya bilang parte kan efforts kan gobyerno ngane na masolsyunan an kadifisilan asin insurhensya sa rehiyon.
Segun pa sa opisyal, an mga tropa na naka-deploy sa duwang probinsya na nagkokondusir nin community support programs an preparadong maghampang sa anumang huma mapa-peace o war time man.
Dugang kaini, an militar asin lokal na gobyerno kan Sorsogon asin Masbate an nagtatrabaho ngane na makua an deklarasyong “Conflict-Manageable and Ready for Further Development” para sa duwang probinsya.
Naitao naman an nasabing deklarasyon sa mga probinsya kan Camarines Sur, Camarines Norte, Catanduanes asin Albay kan mga nakalihis na taon.
Segun pa ki Pramis, nakaresibe man sinda nin report dapit sa recruitment kan NPA na nagpasiring sa rehiyon durante kan enot ng pag-lift kan ceasefire sa pagultanan kan gobyerno asin komunistang grupo.
Alagad segun digdi, pighahalat pa ninda an kumpirmasyon dapit sa nasabing report.
