LEGAZPI CITY – Preparado na an Catanduanes Provincial Disaster Risk Reduction and Management Office (PDRRMO) sa posibleng epekto sa saindang lugar kan pangrarapado ni bagyong Opong.
Segun ki PDRRMO Catanduanes Emergency Operations Section Chief Roberto Monterola sa intrevista kan Bombo Radyo Legazpi na naka-preparar na sinda asin nasa monitoring stage na siring man an mga kaniya-kaniyang Municipal Disaster Risk Reduction and Management Offices kan provincia.
Naka-standby na man suboot an saindang mga personahes para sa posibilidad na deployment enkaso may mga kaipuhanan na gibuhon sa oras kan pag-hagupit kan bagyo.
Piglalaoman man ninda na maisasairarom sagkod sa Tropical Cyclone Wind Signal no.3 an saindang provincia sa mga masunod na oras alagad kun kompara ninda sa mga nakaaging mga bagyo an maikokonsidera ninda na bako makusog an bagyong Opong.
Pigtaram pa kan opisyal na nakabantay na man sinda sa mga serye nin pagbabaha na dati nang na-eksperyensyahan kan mga nakaaging bagyo na tuminama sa saindang lugar alagad dae ninda pigkokonsidera bilang life threatening.
May naka-standby na man sa saindang ofisina na mga generator nganing padagos man giraray an saindang operasyon maski makamate na sinda nin brownout.
May ipigdeploy na man sinda na personahe sa Tabacco Port nganing asikasuhon an mga pasaherong na-stranded na pasiring kuta sa Catanduanes asin ipigdoon an importansya kan pag-antabay sa mga abiso nganing dae mauli sa pagkaka-octaba an saindang mga byahe.
Pagirumdom ni Monterola na magin rigmat, syertuhon na may bastanteng supply nin pagkaon asin inumon, magtenir na sa mga kaharongan asin evacuation centers enkaso namamatean na an hagupit ni bagyong Opong.
 is prepared for the possible impact on their area of the onslaught of typhoon Opong.){kind=link}