LEGAZPI CITY — Klinaripikar kan Philippine Drug Enforcement Agency (PDEA) na wara pang narerekober na cocaine sa probinsya kan Albay sa ibong kan pahayag ni Presidente Rodrigo Duterte na marikas an paglakop kaini sa nacion.
Sa intrevista kan Bombo Radyo Legazpi ki PDEA Albay Agent Enrique Lucero, sa padagos na pagsasagibo ninda nin mga operasyon sa probinsya, negatibo an mga ini sa cocaine huli ta komon na shabu asin marijuana an narerekober.
Pag-eksplikar kan opisyal, an insidente sa Matnog, Sorsogon kun sain narekober an milyon-milyon na kantidad nin cocaine an isinurender sana kan sarong concerned citizen asin bako ini hali sa mga opereasyon.
Kapareho man suboot ini kan narekober na mga bricks nin cocaine sa banwaan kan Tiwi, Albay asin kan insidente kan 2010 na itinapok sana sa kadagatan sa Matnog asin Samar.
Dugang pa kaini na bako man intended na ipabakal sa Pilipinas an nasambitan na droga asin napagpad sana sa Bicol region.
Katakod kaini aminado man ni Lucero na madaling makalaog sa Pilipinas an iligal na mga kontrabando huli sa kadaklan kan mga port sa nasyon na dae marhay nababantayan kan mga otoridad.
Mientras tanto, padagos man an pangapudan kan ahensya sa publiko na makipagkoordinar sain asin dae mahandal sa pagtatao nin impormasyon urog na sa mga opisyal na imbwelto sa illegal drugs huli ta sinda man sana an maaapektaran kaini.
