LEGAZPI CITY- Tatapikon kan Philippine Drug Enforcement Agency (PDEA) an ibang ahensya kan gobyerno asin barangay ngani na magsirbing “force multipliers” sa pakikipaglaban kontra sa transaksyon kan iligal na droga sa nasyun.
Base sa mensaheng ipinadara ni PDEA Director General Isidro Lapeña sa Bicol, obheto kan nasambitan na lakdang na punuan an magigin kakulangan huli sa pagbuwag kan mga anti-drug units kan Philippine National Police (PNP.)
Sinabi ni Lapeña na maski an PNP, pigbawalan na munang magkundusir nin anti-drug operations alagad imamantinir kaini an mahigot na koordinasyon sa PDEA sa gabos na bagay na igwa nin kinaaraman sa droga arog kan pagtipon, pagproseso asin pag-validate kan mga impormasyon, siring man an pagmonitor sa mga drug personalities kabale na an mga surrenderers.
Dugang pa kan PDEA Director, ipagpapadagos kan mga law enforcement agencies an anti-drug operations arog kan National Bureau of Investigation (NBI) asin Bureau of Customs (BOC.)
Tinawan duon kan PDEA an saindang pangapodan na magmukna nin anti-drug abuse councils sa bilog na nasyun kontra sa transaksyon kan iligal na droga sa mga komunidad asin mag-promote nin tabang gikan sa mga barangay sa pagpuho kan drug trafficking asin addiction.
Sigon pa ki Lapeña, dea naglalaban an PDEA sa gyera na dae nin gaganahan huli ta pigdadara ninda an mismong laban puon sa pinaka-ugat kan problema.
