LEGAZPI CITY- Ipigkokonsiderar na inspirasyon kan Philippine Drug Enforcement Agency (PDEA) Bicol tangarig na urog pang magdesider sa pagkondukta kan mga anti-drug operation an naresibeng pagreconocer hale sa central office.
Sa intrevista kan Bombo Radyo Legazpi ki PDEA Bicol spokesperson Cotton Talento, nakua kan ahensya sa pagbubukas kan 2019 an honra sa pagkakaigwa nin pinakadakol na Summary of Information (SOI)-Driven Operations sa bilog na Pilipinas.
Resulta suboot an nasabing pagbisto kan kooperasyon kan mga concerned citizen asin importante kun nakakahiling nin presensya kan mga kaduda-dudang tawo sa lugar na nag-abot sa 800 na operasyon.
Katakod kaini, labi an pasasalamat kan opisyal sa mga stakeholders siring man sa mga partner law enforcement agencies.
Nilinaw man ni Talento na dae magigin epektibo an ano man na ipinaabot na impormasyon kun dae matatawanan nin magkakanigong aksyon.
Afuera sa nasambit na award, nakakua man nin pagbisto si PDEA Bicol Director Christian Frivaldo bilang “The Validator”.
