LEGAZPI CITY – Daeng patod an Philippine Drug Enforcement Agency (PDEA) Bicol sa mga pigsasagibong pagdakop sa mga imbwelto sa ilegal na droga sa rehiyon ngonian na primerong bulan kan 2025.
Segun ki PDEA Bicol Spokesperson Carlo Fernandez sa intrevista kan Bombo Radyo Legazpi na padagos an saindang operasyon na ipigkokondusir sa manlain-laing parte kan rehiyon nganing mahanap asin madakop an mga nagtatarago sa ley mantang may mga na-dismantle man sindang mga drug den sa mga provincia kan Camarines Norte asin Albay.
Afuera pa sa mga PDEA lead operation, may mga isinagibo na man sindang anti drug operation kasabay an Philippine National Police.
Makaugma suboot na padiit-diit nindang nasasawata an mga bikolano na nag-gagamit nin ilegal na droga alagad makamundo na kadakol pa man giraray an dae pa nagpupurundo sa paggibo nin mga salang gawi.
Pigtaram pa ni Hernandez na kadaklan sa mga nadadakop ninda an mga street level individual asin pwedesir na nakukuwa ninda ini sa mga darakulang supplier.
Piglinaw pa kaini na bako gibo sa rehiyon an mga kontrabandong nakukuwa ninda kundi gikan suboot ini sa manlain-laing lugar sa nacion asin pigpapabakal sana sa rehiyon.
Pigtawan doon pa kaini na papakusugon ninda an pagbabantay sa mga terminal, pantalan asin sa mga pwedesir maagihan kan mga tawong may dara kan ilegal na kontrabando sa rehiyon Bicol.
Dugang pa kan opisyal na naga preparar na man sinda sa pagbyahe kan train kan Philippine National Railways nganing maipaotob an seguridad sa mga malaog asin maluwas sa provincia nin huli ta bako sana tawo an pwedeng masakay kaini kundi mga bagahe asin kagamitan na pwedesir gibuhon na taguan nin mga ipupuslit na ilegal na droga.
Bukas man an saindang ofisina sa kun sisay man an mawot magbagong buhay asin magpa-rehab nganing matawan ninda nin magkakanigong tabang.
Pag-asigurar kaini sa publiko na dae sinda mapundo sa pagsawata kan presensya kan ilegal na droga sa rehiyon asin dae matakot na magsumbong sainda kan mga impormasyon na naaraman ninda nin huli ta dae man ninda ibubuylgar an saindang pagkakakilanlan.
