Pinahimutikan kan Philippine Coast Guard an pigpapaluwas na report kan China na tinabangan ninda an mga parasirang Pilipino na nasabugan nin makina nin bangka sa Bajo de Masinloc.
Segun sa Philippine Coast Guard, bakong totoo an report kan China State Media na mga Chinese an enot na nagtabang sa mga Pinoy.
Imbes na tabangan, hinarass asin hinarangan pa suboot kan China Coast Guard an bangka kan mga Pilipino na magdadara kuta kan mga biktima pasiring sa ospital.
Tinawang duon pa kan Philippine Coast Guard na istilo sana ini kan China ngani na maitago an piggigibo nindang sala asin makapagpabida sa ibang mga nasyun.
Mismong an mga biktimang parasira naman na sinda Freddie Legazpi asin Rolando Lumapaz an nagsabing wara nin katotoohan an mga report na ini kan China.
Imbes na maogma natakot pa suboot an saindang mga pag-iriba huli sa pagkahandal na arestaron kan mga Chinese.
