Narekober kan technical divers kan Philippine Coast Guard (PCG) an saro pang hawak kan lalaking biktima hale sa naglubog na MV Trisha Kerstin 3 kan Sabado, Pebrero 14 sa kadagatan kan Baluk-Baluk sa Basilan.
Nakua an lawas hale sa wreck site sa tahaw kan nagpapadagos na underwater operations.
Huli kaini, nagsakat na sa 54 an numero kan mga nagadan sa trahediya mantang 25 pa an nagtetenir na nawawara. Naenot nang ibinaba sa 293 an numero kan mga survivor sa insidente makalihis an masinsinang beripikasyon.
Mientrastanto, nagtitinir man na buo an promesa kan PCG sa paghahanap sa natatada pang nawawarang indibidwal siring man an pagtao nin suporta para sa mga apektadong pamilya sa saindang paghahanap nin paninimbagan asin hustisiya sa malagim na trahediya.
