LEGAZPI CITY – Inasegurar kan Coast Guard District (CGD) Bicol an pag-asister sa mga pasahero na piglalaomang mapipendiente an biyahe huli sa ipigtaas na gale warning sa kadagatan.
Sa intrevista kan Bombo Radyo Legazpi ki CGD Bicol spokesperson Ens. Excelsior Abinoja, posible man na maglangkaw pa an numero kan mga pasaherong mai-stranded an biyahe, magin an mga barko asin truck na magti-take shelter sa mga masunod na oras.
Naka-standby man suboot an mga deployable response group (DRG) sa pagresponde na compuesto nin 25 personahe sa kada team.
Segun pa ki Abinoja, ready man sa pagtataong-asistensya an floating assets asin rescue boats kan PCG sa rehiyon.
Katabang man an lokal na gobierno, nagkaag nin Malasakit Help Desk na magbabantay sa seguridad asin maatendir sa mga pangangaipo kan mga stranded passengers.
Napag-araman na kasuodma pa kan magsagibo nin meeting an Office of the Civil Defense (OCD) Bicol sa mga coordinating agencies bilang preparasyon sa Bagyong Falcon.
