Nagpuon na magpaluwas nin mga abiso an Philippine Coast Guard Bicol para maimpormaran an mga parasisira asin byahero manungod sa sitwasyon kan kadagatan sa Bicol.
Sa intrevista kan Bombo Radyo Legazpi kay CG Ens. Dwan Grace Detoyato, an tagapagtaram kan PCG Bicol, magpuon kan ibandera sa nagkapirang lugar sa Bicol an Tropical Cyclone Wind Signal No. 1 ay tulos na nagpaluwas nin Sea travel Advisory an Ahensya.
Padagos man an isinasagibong monitoring kan PCG Bicol sa gabos na mga pantalan sa Bicol.
Pinaglalaoman na man an posibleng madagdagan an bilang kan mga stranded na mga byahero huli sa namamatian na epekto ni Tropical Depression “KRISTINE”.
Base sa huring datos kan PCG Bicol maabot na sa 782 na mga pasahero an stranded , 88 rolling cargos asin 14 na vessels sa bilog na rehiyon.
Sa presente naka-hightened alert status na an bilog na ahensya asin inaalerto an lambang mga stasyon para sa mga posibleng maging sitwasyon dara kan raot nin panahon.
Inasigurar man kan PCG Bicol an kahandaan sa pagresponde inkasong igwang mga lugar an labing makaranas nin pagbabaha o maging pagresponde sa mga parasisira.
Mientras tanto inihanda na kan ahensya an sa saindang mga personahes hasta sa mga water asin land assets.
