Kinumpirmar kan Palasyo nin Malacañang na pormal na hahagadon ni Presidente Ferdinand Marcos Jr. sa Kongreso na tawan siya nin emergency powers nganing bawasan an excise taxes sa produktong petrolyo sa tahaw kan krisis sa Middle East.
Segun ki Palace Press Officer USec. Claire Castro, an Department of Energy (DOE) masumiter nin pormal na kahagadan sa Kongreso bilang representante kan Presidente huli ta yaon siya sa New York para sa duwang aldaw na working visit.
Piglalaoman na maisusumite an nasabing formal request ngonian na aldaw, Lunes, Marso 9.
Kun magigirumduman, sinabi ni Presidente Marcos na makikipag-olay siya sa mga lider kan Kongreso nganing tawan nin kapangyarihan an presidente na bawasan an excise taxes sa mga produktong petrolyo kun an presyo kan Dubai crude oil an maglangkaw nin lampas sa $80 kada bariles.
Segun ki Marcos, magigin emergency measure ini na tulos na iimplementar oras na matapos na an iriwal sa Middle East.
Sa ibong na lado, sinabi ni Castro na nagpaluwas na nin show-cause order an Department of Energy laban sa 54 gasolinahan na hayagang nagpalangkaw kan presyo kan gasolina.
Sinabi ni Castro na nakipag-olay siya ki Energy Secretary Sharon Garin manungod digdi asin nasambit saiya kan Secretary na dakul na gasolinahan an nagpalangkaw nin presyo nin bako magkakanigo.
