Ipighayag kan Malacañang na nahahandal si Presidente Ferdinand “Bongbong” Marcos Jr. sa posibleng epekto kan mga isinunad na impeachment complaint laban saiya, bako para sa saiyang sadiri kundi para sa kapakanan kan nacion asin kan ekonomiya.
Segun ki Palace Press Officer USec. Claire Castro na an pagsusunad nin impeachment complaint laban sa Presidente an may mahewas na implikasyon asin pwedesir makaapektar bako lamang sa liderato kundi pati sa kamugtakan kan ekonomiya kan nacion.
Tinawan-doon ni Castro, na nagtitinir na kumpiyansa an Presidente na wara siyang ginibong sala, warang binalgar na ley, asin wara siyang nagibong impeachable offense, alagad pigkakahandal niya an pwedesir magin epekto kan proseso sa tiwala kan publiko asin sa dalagan kan ekonomiya.
Nanindugan man an Palasyo na wara sindang kinaaraman sa pagsusunad nin duwang impeachment complaints laban ki Vice President Sara Duterte.
Sinabi ni Castro nasa kamot na kan kongreso na busisiin asin pagdesisyunan an mga kasong ini laban sa ikaduwang Presidente.
Dugang niya na haros wara man na bago sa isinunad na duwang kaso laban sa bise presidente, kung igwa man suboot an diit sana.
