Nangapudan si Presidente Ferdinand Marcos Jr. sa Kongreso na tulos na amyendahan an Electric Power Industry Reform Act (EPIRA) nganing dagos na mahale an system loss charge na ipinapasa sa mga consumer bilang parte kan saindang buwanang singil sa kuryente.
Sa saiyang ikalimang State of the Nation Address (SONA) sinabi kan Presidente na malinaw sa gobierno an pangapudan kan publiko na mapababa an presyo kan kuryente sa nacion.
Segun ki PBBM, dae dapat ipinapasa sa mga consumer ang system loss huli wara sindang paninimbagan sa pagkawara kan kuryente mantang ini nag-aagi sa transmission asin distribution system.
Huli kaini, hinagad kan Presidente an tulos na pag-amyenda sa EPIRA nganing ipagbawal an paniningil ng system loss sa mga consumer, kabale an value-added tax (VAT) na ipinapataw digdi.
An EPIRA o Republic Act No. 9136 ang ley na nagreporma sa industriya kan kuryente kan 2001. Sa irarom kan presenteng mga probisyon kaini, pigtutugutan an mga distribution utility na ipasa sa mga consumer ang parte kan system loss na kawsa kan technical losses asin pirang non-technical losses, siring kan illegal connection asin panghahabon kan kuryente.
Afuera sa pag-amyenda sa EPIRA, inengganyar man ni ni PBBM ang Kongreso na ipasa an propwestong “Sariling Kuryente” Act, na obhetong gibohon na marikas asin mas abot-kaya ang pagbugtak nin rooftop solar panels asin battery storage systems sa mga kaharongan.
Segun sa presidente, makakatabang an propwestong ley nganing magkaigwa nin mas kadakol na alternatibong pinagkukunan kan kuryente an mga Pilipino asin mabawasan an saindang gastuson sa singil sa kuryente.
