Ipig-orgolyong pigreport ni Presidente Ferdinand R. Marcos Jr. na “very productive” an saiyang working visit sa New York, Estados Unidos, makalihis ibusol an kandidatura kan Pilipinas sa UN Security Council, ibusol an mga deretsos kan mga kababaihan, asin inengganyar an mga Amerikanong namumuhunan na magnegosyo sa nasyon.
Sa saiyang pag-atendir sa ika-70 sesyon kan Commission on the Status of Women, tinawan duon kan Presidente na nasusukol an tunay na pag-uswag kan nasyon sa estado asin kapangyarihan kan mga kababaihan.
Tinukar man niya an importansya kan edukasyon, pakikisumaro laban sa kadahasan laban sa mga kababaihan, asin an saindang partisipasyon sa paggibo nin desisyon.
Nakipag-ulay man si Marcos ki UN Secretary-General António Guterres kun sain pigdoon kaini an padagos na suporta kan Pilipinas sa United Nations asin multilateralism.
Sa hampang kan mga miembro kan UN General Assembly, idinoon niya an importansya kan rule of law asin matuninong na pagresolba sa mga iriwal.
Inihayag liwat kan Presidente an kamawotan kan Pilipinas na magin non-permanent member kan UN Security Council para sa terminong 2027–2028 nganing matawan nin boses an Indo-Pacific, developing asin climate-vulnerable na mga nasyon.
Mientrastanto, nakipag-olay man si Marcos sa nagkapirang business leaders, kabale na an U.S. Medical Glove na planong magtugdok nin manufacturing facility sa nasyon na pwedesir na makakrear nin labi sa 2,000 na trabaho.
Nakipag-olay man siya sa mga opisyales kan J.P. Morgan nganing pag-olayan an kooperasyon sa ekonomiya asin mga isyung pankinaban na nakakaapektar sa financial markets.
