Suminuko na sa kapulisan si PBA player John Amores pagkatapos na masangkot ini sa insidente nin pambabadil.
Nahiling sa CCTV footage an basketbolista na nagbaba sa motorsiklo na pigmamaneho kan 20-anyos na tugang kaini sa Barangay MayTalang I kan alas-5 nin hapon kan nakaaging Miyerkules.
Sa nasabing footage mahihiling na pagkababa ni Amores bigla kaining pinaputukan nin badil an lalaki na nagdadalagan.
Segun kay Police Major Bob Louis Ordiz, chief of police kan Lumban Municipal Police Station, na bago an insidente may nakainitan asin nakapasuway si Amores sa sarong karawat sa Barangay Salac.
Suminuko an basketbolista kaiba an saiyang tugang kan huwebes na maagahon.
Kun magigirumduman, si Amores na dating parakawat kan Jose Rizal University na kun sain pinatawan ini nin ban kan NCAA pagkatapos na suntukon an apat na parakawat kan De La Salle-College of St. Benilde kan taong 2022.
Sa ibong kan naunambitang insidente, kinuwa ini kan NorthPort Batang Pier sa fifth round kan 2023 PBA Rookie Draft.
