Ibinasura kan Pasig City Prosecutor’s Office an kasong frustrated murder na isinunad kontra sa sarong pulis na na-videohan na ipigtulak an sarong motorcycle rider sa tahaw kan dae pagkakasinabutan sa kalabaan kan C5 Road.
An reklamo an ipigsunad kan Quezon City Police District (QCPD) kontra ki Staff Sergeant Erwin Lagua makalihis maglakop online an video kan insidente.
Enot ng nagsunad an QCPD nin mga kasong slight physical injuries asin malicious mischief kontra ki Lagua, alagad kalaunan binago ini bilang frustrated murder susog sa direktiba ni National Police Commission (Napolcom) executive officer Rafael Vicente Calinisan.
Marurumduman na tinuyaw ni Calinisan sinda Lt. Col. Edison Ouano, hepe kan QCPD Criminal Investigation and Detection Unit, asin Cpl. Benito Catungal huli sa suboot “wrongful and deliberate downgrade” kan kaso.
Huli digdi, pigsugo man ni Calinisan an relief ninda Ouano asin Catungal sa saindang mga pwesto asin pigsugo an Napolcom inspection, monitoring and investigation service na imbestigaran an duwang opisyal.
Sa ipinaluwas na resolusyon, sinabi kan Pasig prosecutor’s office na warang bastanteng ebidensya ngani na idagos an kasong frustrated murder asin malicious mischief kontra ki Lagua.
Segun sa piskalya na dae pwedesir na sunadan nin malicious mischief an pulis huli ta itinulak sana kaini an motorsiklo kan complainant na si Jhone Vincent Cayanes makalihis siyang habulon ngani na komprontahon.
