Tinuyaw ni Bicol Saro Rep. Terry Ridon si Cibac partylist Rep. Eddie Villanueva makalihis an suboot patanid kaini katakod kan imbestigasyong ipigbubusol ni Ridon sa flood control scandal.
Magigirumduman na sa ginibong hearing kan House Infrastructure Committee kan Setyembre 9, pig-akusaran kan dating Bulacan engineer na si Brice Hernandez si Senador Jinggoy Estrada asin Joel Villanueva na nag-aako nin kickback sa mga proyekto.
Sa sarong sermon, ipinahiling ni Bro. Eddie an yearbook photo ninda Ridon asin Hernandez asin sinabing, magpasalamat suboot ini huli ta “born again” na siya, na patama kay Ridon.
Kasimbagan man ni Ridon na baka suboot makulong talaga si Senator Joel maski isumpa pa niya an infra panel head.
Dugang pa ni Ridon na bako lang si Hernandez an nagdawit sa senador kundi magin iba pang personalidad asin mga dokumento.
Sa senado, pigdawit man kan dating opisyal kan DPWH na si Henry Alcantara si Sen. Villanueva sa P150M na kickback hale sa flood control funds na suboot itinao sa saiyang katabang na si “Alyas Peng” sa sarong resthouse sa Bocaue.
Segun ki Alcantara, dae aram ni Villanueva na hale sa flood control an pondo, alagad nanindugan si Ridon na dapat simbagon kan senador an mga kahapotan manungod sa transaksyon.
Nanindugan si Ridon na bako bastante an mga paliwanag asin dapat na hampangon ni Sen. Villanueva an mga alegasyon sa paagi nin due process.
