(Update) LEGAZPI CITY- Magsirbi nawa na “wake-up call” para sa Department of Education (DepEd) asin lokal na gobierno an sinapar kan paratukdong pinagsasaksak sa laog kan eskwelahan kaibanan an duwang estudyante kaini sa Brgy. Oringon, Pioduran, Albay.
Ini an matagas na pahayag ni Jun Villa, tiyo kan esposo kan paratukdong ginadan na si Mylene Durante, 23-anyos sa ekslusibong intrevista kan Bombo Radyo Legazpi.
Enot nang napag-araman na nakikiturog sa eskwelahan si Teacher Mylene huli ta nadidipisilan ini sa labi sa sarong oras na pagbiyahe makauli sana sa harong sa banwaan kan Polangui.
Segun ki Villa, haloy naman na pighahagad kan paratukdo an paglipat sa mas haraning eskwelahan alagad tulong taon muna sa area assignment an kinakaipuhan sa area of assignment antes na maaprubahan an request.
Suhestiyon ni Villa na magkaigwa nin agreement sa pagtataong-seguridad sa mga paratukdo na naa-assign sa hararayong lugar tangarig na maibitaran an mga siring na pangyayari.
Mientras tanto, hustisya man an kurahaw ngonian kan esposo kan paratukdo na si Aljohn Durante asin pagpapanimbag sa irarom kan ley sa responsable sa krimen.
Sa pagkagadan ni Teacher Mylene, nawalat kaini an mga aking edad saro asin tulong taon.
