LEGAZPI CITY — Pinaglalamayan na ngonian an sarong paraoma makalihis na madiskubreng gadan sa provincia kan Sorsogon.
Binisto an biktima na si John Mike Rosales, 28-anyos asin residente kan Barangay San Isidro, banwaan kan Barcelona.
Segun ki Police Senior Inspector Jasper Agnote, hepe kan Barcelona MPS, ipinaabot sa hepatura an impormasyon mapadapit sa pagkakarekober kan bangkay ninda Kagawad Salvador Funtalba asin barangay Tanod Ronald Corañes.
Sa inisyal na imbestigasyon kan mga otoridad, naglalakaw an tiyuon kan biktima na si Antero Pura kan mahiling na duguan asin nakahigda si Rosales asin nahiling man na igwa ining tama nin saksak sa liog siring man an iba pang mga lugad sa manlaen laen na parte kan hawak.
Sa presente dae pa maaraman kun ano an motibo sa insidente asin nagpapadagos pa an ipigkokundusir na imbestigasyon sa pagkakabisto asin pag-aprehender sa posibleng suspek sa krimen.
