LEGAZPI CITY — Pigtutubudang miyembro kan rebeldeng New People’s Army (NPA) an mga suspek sa paggadan sa sarong paraoma sa banwaan kan Matnog sa lprobinsya kan Sorsogon.
Binisto an biktima na si Noli Garlan, 59 anyos asin residente kan Bgy. Senibaran kan nasabing banwaan.
Sa imbestigasyon kan Matnog Municipal Police, napag-aramang niranihan kan sarong armadong lalaki an nakatukaw na biktima asin hinapot an pangaran kaini.
Alagad kan magtalikod si Garlan, bigla na sana ining pinaputukan nin duwang beses na nagtama sa payo asin ibabang parte kan likod kaini.
Makalihis an insidente, tulos na nagdulag an suspek pasiring sa sentro kan barangay mantang nakua sa pinangyarihan kan insidente an duwang basyo nin bala kan kalibre 45 badil.
Sa isinagibong follow-up investigation, nabisto suboot kan mga witness an suspek na si Noli Balote kan Brgy Tugas, Matnog asin kairiba kaining sinda Allan Estavillo asin Betong Estavillo na suboot miyembro kan NPA.
Pigsasabing nagpalyar na makapagtao nin revolutionary tax para sa saiyang niyugan an biktima kun kaya ini ginadan kan NPA-Disterio.
Sa ngunyan, padagos an pigsasagibong imbestigasyon kan mga otoridad para sa pagkakaarestar kan mga suspek.
