LEGAZPI CITY – Ikinaugma kan Simabahang Katolika an kasuguan ni Presidente Rodrigo Duterte na paramientras punduhon an kampanya kan administrasyon laban sa iligal na droga.
Segun ki Father Rex Arjona, sarong ‘answered prayer’ an naging lakdang kan presidente asin garong nagbunga man an saindang pagpangadyi kada alas nueve nin banggi para sa katapusan kan pig-aapod na extrajudicial killings.
Maski suboot temporaryo sana an nasabing lakdang, maugma sinda huli sa maski purupapano, mapupundo an mga garadanan.
Alagad segun ki Arjona, padagos man liwat an saindang ‘watching asin praying’ sa aksyon kan administrasyon.
Naglalaom man an Simbahang Katolika na sana an pagpundong ini magresulta sa masusing imbestigasyon, tunay na reporma sa kapulisan asin baka lamang sa pagkrear asin pagpili nin evidence-based na polisiya sa paglaban sa droga.
Sa ibong kaini, dae man liwat nahahali an pagkahandal kan simbahan huli sa tibaad suboot mangayri ngunyan an pigsasabing ‘war on rogue cops’ kun saen an mga pulis man ngunyan an target kun kaya padagos an saindang pangapudan sa due process asin human rights.
